May 13, 2008
May 5, 2008
عن البنزين
Posted by Mariam Omran under إكتئاب, تخاريف تودي في داهية, تخاريف مؤسفة, تخاريف من الي تحرق الدم و تفقع, قريفة, نعم؟؟؟[8] Comments
الساعة 2:30 الضهر
- مريم
- أيوة يا بابا
- عايزين رأي واحدة معارضة
- في إيه؟؟؟
- حبيبتي البنزين غلي 45 قرش في ال 92 و 40 قرش في ال 95
- يا نهار إسووووووود.. البلد هتغلي كده و حياة ديني لو الناس و لعت في البلد يبقى عندهم حق و هاتلي حد من حزبك ( الوطني ) يتكلم… يعني هو إداهم علاوة من هنا عشان يغلي البنزين من هنا
- يا بنتي ما هو سعر البنزين متوقف على سعر برميل البترول عالميا
- بابا و النبي ماتخليني أخرج عن شعوري و أقول لفظ إعتراضي سخيف
- بس يا سافلة
- ماشي يا عم
————————————
الساعة 4:20
- يا مريم
- خير يا عم الحاج
- لغوا قرار زيادة أسعار البنزين
- هاهاهاهاهاههااهها تلاقيهم خافوا من اللي هيحصلهم
- لأ وإنتي الصادقة تلاقيهم سمعوا كلامك ليا
- ماشي يا بابا
———————————
الساعة 11:00
- يا مريم
- أيوة يا ماما
- مش نظيف طلع في الأخبار و قال إن البنزين فعلا غلي و القرار هيطبق من دلوقتي
- أحه يا ماما
- إنت يا بنت إتلمي
- هو عاد فيها لمه
تررررن ترررررن تررررررن
- ألو… أيوة يا بابا
- أيوة يا مريم
- خير؟؟
- ده أنا متصل أقولك إني لسه مخلص خناقة مع زبون
- خير يا بابا ؟؟ إيه اللي حصل؟؟
- الناس مش عاجبها الأسعار عايزين يحسبوا على السعر القديم
- و أنت متصل بيا أهيدهم يعني؟؟
- لأ متصل أشوف إيه رأيك؟؟
- رأي إن البلد تولع بقى
- ماشي يا بنت الكلب
- ماشي يا بابا خد بالك لتتضرب سلام
تيت تيت تيت تيت
——————————————-
خلاصة القول : أحا
May 4, 2008
أنا بقالي كتير قووووي قد الدنيا عايزة أحكيلكم عنه.. و بعدين قلت هكتب عنها في 6 أكتوبر إن شاء الله… بعدين حسيت إن 6 أكتوبر بعيدة قووووي… بعدين بعد مالقيت إن 4 مايو فشل زي ما كنت أنا و كتير غيري متوقعين قولت لأ هكتب عنه دلوقتي أهي حاجة تطلعنا من مود الفشل …. الراجل ده أنا عارفاه من و أنا عندي بتاع 4 سنين لأنه كان أعز أصدقاء أبويا.. و أنا ماكونتش أوعى على كلمة بطل لغاية ما بقيت بتاع 10 سنين كده…. أبويا حكالي عنه و مان كل مرة يحكيلي مات إزاي كان جسمي بيقشعر و بدمع… بحب قصته قووووووي.. المهم من يجي كده شهر بقلب على جوجل و الفااس بوك ألاقي ناس كاتبه عنه !!!! فرحت قووووي و جريت قلت لبابا و وريتله الكلام….فرح هو كمان و قالي الله يرحمه و قعدت تحت رجل بابا زي ماكنت بعمل و أنا عندي 10 سنين و قعد بابا يحكيلي القصة تاني لأن بابا كان في نفس كتيبة الشهيد أصحاب بقى مع بعض في كل حاجة !!! و أما بابا وصل للجزء المهم لقيت جسمي قشعر تاني زي ما كان بيقشعر و أنا صغيرة.. و بدأت أدمع… بابا كمان دمع و قمت و عملت كوبي للكلام اللي لقيته مكتوب عنه مش فاكرة بصراحة الموقع و جيت نقلته هنا… أنا عارفة إن في الحرب العظيمة كل شهيد كان بطل و كان ليه حكاية بس المرة دي البطل ده أنا عاررفاه و أما بسافر البلد بروح بيته و بعد مع بنات إخواته و إخواته و نعد نرغي…. مش قادرة أصدق الجمال.. عارفين إحنا لوو كلنا على بعضنا كده بنحب بلدنا قوووي قوووي قووي قد واحد من الأبطال اللي إستشهدوا و الله هتكبر بينا و تحلى…. إقروا وقولولي رأيكم
—————————————-
العقيد الشهيد محمد زرد
بعد عبور القوات المسلحة المصرية لقناة السويس اضخم مانع مائي عرفه التاريخ وقف خط برليف المحصن حاجزا امام عبور القوات المصرية الى قلب سيناء الا ان الهجوم الكاسح اسقط كل هذه الحصون الا نقطة واحدة بقيت مستعصية على السقوط فى ايدى القوات المصرية.وكانت هذه النقطة محصنة بطريقة فريدة وقوية ويبدو انها كانت مخصصة لقيادات إسرائيلية معينة .. وفشلت المجموعة المصرية فى اقتحام هذه النقطة المشيدة من صبات حديدية مدفونه فى الارض .. ولها باب صغير تعلوه فتحة ضيقة للتهوية … وكان يقلق المجموعة المكلفة بالتعامل مع هذا الحصن ان الاعلام المصرية اصبحت ترفرف فوق جميع حصون برليف بعد سقوطها عدا هذا الموقع الصامد الذى فشلت معه كل الاساليب العسكرية للفرقة المواجهة له.واذا بالارض تنشق عن العقيد محمد زرد يجرى مسرعا تجاه جسم الموقع متحاشيا الرصاص الاسرائيلي المنهمر بغزارة من الموقع ومن ثم اعتلاه والقى بقنبلة بداخلة عبر فتحة التهوية وبعد دقيقتين دلف بجسده الى داخل الحصن من نفس الفتحه وسط ذهول فرقته التى كان قائدا لها ، وخلال انزلاقه بصعوبة من الفتحة الضيقة وجه له الجنود الإسرائيليين من داخل الموقع سيل من الطلقات النارية اخرجت احشائه من جسده ، وفى هذه اللحظات تأكدت فرقته من استشهاده .وما هى الا ثوان معدوده واذا بباب الحصن يفتح من الداخل ويخرج منه العقيد محمد زرد ممسكا أحشاؤه الخارجة من بطنه بيده اليسرى واليمنى على باب الحصن تضغط علية بصعوبة لاستكمال فتحه … سبحان الله …
واندفع الجنود المصريين الى داخل الحصن واكملوا تطهيره ، ثم حمل الجنود قائدهم زرد الى اعلى الحصن وقبل ان يفارق الحياه لمس علم مصر وهو يرتفع فوق اخر حصون خط برليف اقوى حصون العالم فى التاريخ العسكرى ثم يفارق الحياة بطلا نادر التكرار …
May 4, 2008
يا ريسنا يا حبيبنا بنعزك و بنقولك كل سنة و أنت ……. قولوا إنتم… أقولكم أنا؟؟؟ لقيت أغنية كده و أنا بدعبس و قولت هي دي… إيه رأيكم؟؟ مش هي برضه ؟؟ أنا كاتبه كلمات القصيدة كلها حتى اللي متغنتش.. أوكي ؟؟؟
——————————————————-
يامه مويل الهوي
يامه موايليا
طعن الخناجر ولا
حكم الخسيس فيا
الصبر حلم العواجز
يطرح زهور الأماني
والقهر عدى الحواجز
وأنا إللي واقف مكانى
شايف غيطان البشاير
خايف . وكانن إديا
حتى الحمام إللي طاير
ما رضيش يرفرف عليا
يامه مويل الهوي
يامه مويليا
طعن الخناجر ولا
حكم الخسيس فيا
سألت شيخ الطريقه
ما رضيش يجاوب سؤالي
ودارى عني الحقيقه
وفاتني حاير ف حالي
سألت شيخ الأطبا
دوا الجرح إللي بيا
نظر لي
نظره محبه
وقال دوايا بايديا
يامه مويل الهوي
يامه مويليا
طعن الخناجر ولا
حكم الخسيس فيا
يامصر
وإنتي الحبيبة
وإنتي اغترابي وشقايا
وإنتي الجراح الرهيبه
وإنتي إللي
عندك دوايا
علمني حبك عباره
سهله
وبسيطه
وعفيه
شرط المحبه الجسارة
شرع القلوب الوفية
يامه مويل الهوي
يامه مويليا
طعن الخناجر
ولا
حكم الخسيس فيا
May 3, 2008
ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي !!
May 3, 2008
Thank you all for coming yesterday .. being with US yesterday really meant a lot 
and for thoses who didn’t come…. THANK YOU TOO
May 1, 2008
April 30, 2008
هو إنت هتفضل معايا ؟؟
و لا إحتمال تمشي و تسيبني؟
ولا ممكن تكمل معايا؟
و لا هتبعد عني؟
و لا عايز تكون ويَايَا
ولا مش عايز و ممكن تهج؟
هو إنت بتحب لُقايا؟
ولا بتزهق لما بتكون معايا؟
إنت عارف , إن روحي فيك؟
و إني مبفكرش غير في رضاك ؟
و إني مبحلمش غير إني أكون معاك؟
إنت عارف إني هفضل معاك؟؟
و مش همشي و أسيبك
إنت عارف إني هكمل معاك
و مش هبعد عنك؟
إنت عارف إني عايزة اكون ويَاك؟
و مش ممكن أهج…
طيب عارف إني بحلم بلُقاك؟
و مش بزهق لما بكون معاك ؟
إنت عارف إني بحبك
و إني متمسكة بيك حتى لو فرقتنا بلاد
April 26, 2008
و أنا قاعدة في سيلنترو دلوقتي هروبا من زهق البيت, فكرت في حاجة مهمة قووي: هو إحنا ليه بنسلمش على بعض؟؟؟
ليه مش بنضحك في وش بعض قووي و نهمس نقول : إزيك ؟؟ حتى لو مش عارفين بعض ؟؟!! فيها إيه يعني؟؟
أنا جربت أعمل الحكاية دي من ساعة من نزلت من البيت لغاية ما جيت أعدت هنا, جربتها مع 5 بنات و ولدين
الولاد ضحكوا ضحكة غبية ( اللي هيا معناها إلحق يالا إنت علقتها)
البنات في واحدة ردت عليا السلام بإبتسامة جميلة
وإتنين كانوا ماشين مع بعض بصوا لبعض و ضحكوا قووي و مشيوا من غير ما يردوا عليا السلام
و واحدة عدت من جنبي و لا كأني عملت حاجة
الأخيرة بقى هي اللي كنت عايزة أوصلها: جت سألتني هو إنتي تعرفيني؟؟ قولتلها: هو أنا لازم أعرفك عشان أبتسملك و أسلم عليكي؟؟ ضحكتلي و قالتلي لأ.. إنت عاملة إيه؟؟ قولتها الحمد لله قالتلي مش عايزة حاجة قولتلها لأ شكرا خدي بالك من نفسك سلاااام… قالتلي: أوكي سلااااام
حبيت في البنت دي إنها خدت و إدت معايا في الكلام مش من غير ماتسألني حكمت عليا بالغباء أو الجنان أو إن الواد علقني !!!
ليه سوء النية بقت جوانا على طوول؟؟
وإحنا سايقين ولاقين بنت واقفة على الطريق لوحدها: ليه بنفكر 100 مرة قبل مانوقف و نعرض عليها توصليها لأقرب نقطة ؟
ليه لما ولد يلاقي بنت بتبصله بضحكة أو إبتسامة يبقى البت دي عايزة تعط !! يلا ندوس يا عيال؟؟؟
أفكارنا بقت سودة و سخيفة
بقينا بنفكر في نفسنا بس كويس
و في بقيت الناس زفت
————————–
من خلال تجربتي في المشاركة في احد المواقع المهمة على الساحة إتأكدت فعلا إن أي خلية نضيفة بتحب تكبر لازم يجيلها فيروس يهدها و المشكلة إن كل أعضاء الخلية بتمشي مع الفيروس ده و بتسيبوا يسيطر عليها و اللي بيلحق نفسه من الفيروس بيخروج برا الخلية سواء بمزاجه أو بالزق !!
و ده إيه سببه ؟؟
سوء النية ؟؟ و لا الأنانية؟؟ و لا عدم التقدير؟؟ و لا عدم تشغيل الدومة ( ألا و هي النافوخ) ؟؟
ما فيش ولا حاجة من دي السبب
السبب هو إن إحنا ماينفعش نقود نفسينا بنفسينا أما نكون في مجموعة و لا بنحب التغير .. بمعنى : لازم أي مجموعة ليها قائد واحد أوحد.. طيب جميل زهقنا من القائد ده يلا نغيره نجيب قائد جديد.. أكيد هيكون فيه تغير ( بس المهم إنه يكون للأحسن) الناس بترفض رفض شنيع, ليه ؟؟ عشان فيه حاجة إتغيرت !؟؟!! طيب ماتجربوا الجديد مش ممكن يكون مفيد؟؟؟ لا لا لا لا
طيب بلاش ده كله طيب بما إننا ناس متحضرة ليه لازم يكون لينا قائد ؟؟ ليه منكونش إحنا قادة نفسينا؟؟ نمشي نفسينا و ناخد رأي بعضينا و نقضيها ؟؟؟ لا لا لا لا هتحصل فوضى… طيب من مين ؟؟ مش هي منكم إنتم يا متحضرين ؟؟؟ لازم يكون في حد شاكمكم؟؟؟
——————–
سيبكم من ده كله خلونا نرجع لموضعنا ألا و هو ليه ؟؟
أقولكم كفاية رغي كده هي ليه واحدة و خلاص :
ليه الناس كلها في سيلنترو مبرقالي عشان رغيت مع الويتر شوية و ضحكت معاه و بعدين قولتله إقرا اللي أنا كتباه و قولي إيه رأيك ؟؟؟
April 25, 2008
